COVID-19:Waumini watakiwa kufuata ushauri wa wataalam pia na sio maombi pekee

Na  Clief  Mlelwa,Makambako

Waumini wa madhehebu mbalimbali mkoani Njombe wametakiwa kufuata maelekezo yanayotolewa na wataalam wa afya na serikali kwa ujumla katika kukabiliana na virusi vya Corona badala ya kuamini maombi pekee.

Hayo yamesemwa na mchungaji wa kanisa la kiinjili la kilutheli  Tanzania usharika wa Mji Mwema  mjini Makambako LYOSI MWALYOSI wakati akizungumza na Ice fm,ambapo amesema kuwa waumini wote wanatakiwa kuchukua tahadhili dhidi ya ugonjwa huo kwa kufuata maelekezo ya watalaam wa afya badala ya kuamini suala la maombi pekee.

Mchungaji LYOSI amesema kuwa waumini wanatakiwa kuelewa kuwa hata maandiko matakatifu yamesisitiza watu kuwa na maarifa,hivyo wasipofanyia kazi maelekezo hayo ikiwemo kuepuka mikusanyiko isiyo ya lazima na kunawa mikono kila wakati kwa maji tiririka na sabuni wataangamia.

Aidha mchungaji huyo amewataka wananchi kuhakikisha wazee,watoto na wenye magonjwa hususani kisukari na HIV wanawekewa mazingira rafiki ya kujikinga na ugonjwa huo kwa kuwa kupitia wataalam wa afya wamethibitisha kuwa makundi hayo yapohatiani kupata maambukizi hayo.

Kwa upande wao waumini wa kanisa hilo wameonyeshwa kuridhishwa na utaratibu wa kuwa na misa tatu badala ya mbili za awali na kueleza kuwa hali hiyo itapelekea wajikinge na maambukizi  ya virusi vya corona.