COSTECH wakabidhi zaidi ya milioni 600 kwa kituo cha utafiti wa mifugo Mpwapwa

DODOMA.

TUME ya taifa ya sayansi na teknolojia nchini,COSTECH imetoa zaidi ya shilingi milioni 600  kwa kituo cha utafiti wa mifugo Mpwapwa jijini Dodoma ili kufanya maboresho ya miundombinu kuongeza ufanisi katika utendaji wao wa kazi utakaochangia wafugaji kufanya ufugaji wa kisasa unaoendana na soko Duniani.

Hayo yamesemwa na Dkt Eliakunda Kimbi  ambaye ni mkurugenzi wa kituo cha utafiti wa mifugo, Mpwapwa jijini Dodoma ,  wakati wa ziara iliyofanywa na tume ya taifa ya sayansi na teknolojia (COSTECH)  kwa lengo la kufuatilia utekelezaji wa miradi inayosimamiwa na tume hiyo akieleza kuwa miongoni mwa majukumu yao ni pamoja na upandikizaji wa viini tete vya ngo’mbe.

Dkt. Kimbi ameishukuru COSTECH kwa kuishika mkono sekta ya mifugo akisema kwamba baadhi ya watu hushindwa kujikita katika ufugaji kutokana na shughuli hiyo kuonekana  kufanywa na makabila fulani mtazamo ambao husababisha kuipa kisogo fursa ya ufugaji ambao ukisimamiwa vyema ni wazi utachagiza sana maendeleo ya mfugaji na kuongeza pato la taifa.

Pia amewataka wafugaji  kuwa wabunifu katika shughuli zao hatua  itakayochangia uzalishaji wa mifugo wenye tija kwa kuzingatia ushauri wa wataalamu na kuongeza thamani ya mifugo hiyo itakayokuza soko la mifugo kimataifa.

Dkt. Kimbi amesema zipo changamoto nyingi zinazoikabili sekta ya ufugaji ikiwemo gharama za ufarishaji wa viini hivyo kutoka afrika kusini na wakati mwingine huaribika,  mabadiliko ya tabia nchi, upungufu wa malisho ambazo mara nyingi husababisha migororo ya wakulima na wafugaji  huku akiwasihi wafugaji na wanaotarajia kufuga kufuatilia kanuni za ufugaji kwa mujibu wa sheria ili kuwa na ufugaji salama.

Akizungumzia shughuli za kituo hicho mtafiti na msimamizi wa mradi Kabuni Thomas kabuni amebainisha kuwa  kituo hicho ni kati ya vituo saba vya taasisi ya utafiti wa mifugo nchini akiongeza kuwa lengo la kuanzishwa kwa mradi  ni kuboresha uzalishaji wa viini tete vya ngo’mbe kuondokana na ufugaji uliozoeleka  na kuhamia kwenye uzalishaji wa kisasa wa upandikizaji wa mbegu unaoendana na teknolojia ya sasa.