Mkuu wa Wilaya ya Kisarawe Jokate Mwegelo amesema jana tarehe 20/03/2021 ilikuwa ni siku ya kumbukumbu ya kuzaliwa kwake lakini aliitumia siku hiyo kutafakari maisha na kifo cha aliyekuwa Rais wa Jamhuri ya Muungano wa Tanzania Dkt. John Pombe Joseph Magufuli.
Mkuu wa wilaya huyo kijana aliyeteuliwa kuwa DC wa Kisarawe na Hayati Dkt. Magufuli ameandika maneno hayo leo katika mtandao wa kijamii na kuwataka wananchi wasikate tamaa katika kufanya mema ili waweze kuacha alama duniani.
"Jana tarehe 20/03/2021 ilikuwa ni kumbukumbu ya siku yangu ya kuzaliwa, lakini imekuja wakati ambao taifa tuko kwenye majonzi makubwa ya kuondokewa na Jemedari wetu, Rais wa Awamu ya Tano, Dkt. John Pombe Joseph Magufuli, hivyo nilitumia muda kutafakari maisha na kifo cha Rais wetu mpendwa. Hakika maisha na uhai ni upepo tu. Lakini isitukatishe tamaa kufanya mema kadri ya Mungu atakavyotujalia ili tuweze kuacha alama," ameandika DC Jokate Mwegelo.
Aidha, Jokate ameeleza kuwa Hayati Rais Dkt. Magufuli aliongoza taifa kwa kujitoa licha ya maradhi yake ya muda mrefu ya moyo huku akiahidi kuyaenzi mema yake yote aliyofanya kwa ajili ya taifa kwa vizazi vijavyo na vya sasa.
0 Comments