RED CROSS Tanzania,kuvifikia vijiji 381 Njombe kupeleka elimu ya kujikinga na Corona

 

Na Amiri kilagalila,Njombe

Chama cha Msalaba Mwekundu (RED CROSS TANZANIA) wamezindua mpango wa utoaji elimu ya kujikinga na maambukizi ya virusi vya Corona mkoa wa Njombe,ili kukata mnyororo wa maambukizi ya virusi hivyo nchini Tanzania.

Akizungumza mara baada ya uzinduzi wa zoezi hilo,Rais wa Tanzania red cross Society David Kihenzile,amesema kwa kuwa serikali ilishaanza kufanya kazi ya uelimishaji lakini wao kama Chama wameona haja ya kuongeza nguvu kama wasaidizi wa serikali katika utoaji wa huduma za kibinadamu.

Kihenzile amesema wanaendelea na zoezi hilo la utoaji wa elimu karibu mikoa yote nchini huku mpaka sasa mikoa isiyozidi mitatu ikiwa bado haijafikiwa na lengo likiwa ni kufikia mikoa yote nchini.

Amesema kwa mkoa wa Njombe wanakwenda kuvifikia vijiji vyote 381 na mitaa yake 82 ili kuiongezea nguvu seriklai kwa ajili ya kutoa elimu kwa jamii

“Tutakwenda kufikia katika mkoa wote wa Njombe kwa maana wilaya zote na halmashauri zake sita,kata 107,tarafa 18,tutafikia vijiji 381 na mitaa yake 82,tutafikia maeneo ya umma na ya mikusanyiko ili kuiongezea nguvu serikali kwenye kutoa elimu kwa jamii,na hatuendi kuongeza neon kwa kuwa jumbe imeshapangwa na wizara ya afya kwa hiyo sisi tunaenda kupaza sauti”alisema David Kihenzile 

Simon M Kadogosa ni meneja Tathmini Magonjwa ya Mlipuko kwa niaba ya Katibu wa Red Cross Tanzania,ameendelea kuwasihi watanzania kupokea maelekezo ya wataalamu wa afya dhidhi ya kujikinga na virusi vya Corona huku akibainisha kuwa miongoni mwa nyenzo watakazozitumia katika kutoa elimu ni pamoja na mabango yenye jumbe za maandishi,vipeperushi pamoja na vipaza sauti.

“Tutaunga mkono jitihada za serikali za utoaji elimu kwa jamii kwa kuleta mabango 4000 yatakayobandikwa maeneo tofauti ndani ya halmashauri zote kwa mpango jumuishi,tuna vipeperushi elfu kumi na nne pia vitakavyogawiwa mkoa mzima,lakini pia watumishi wa kujitolea wa Red Cross watatumia vipaza sauti kwenye maeneo ya kimkakati kuhakikisha zile jumbe za sauti za watu wasio jua kusoma wanaziskia na kuzifanyia kazi”alisema Kadogosa

Naye Mkuu wa wilaya ya Njombe Ruth Msafiri aliyekuwa mgeni rasmi wakati wa uzinduzi wa mpango huo katika ukumbi wa chuo kikuu huria uliopo kwenye maeneo ya ofisi za mkoa wa Njombe,amesema mapambano ya Corona sio viongozi bali ni kila mwananchi hivyo ni lazima kila mwananchi apambane huku akifanya kazi.

“Elimu kwetu inaendelea lakini lazima tuamini Mungu,na sisi huku tumeongeza nguvu kwa maneno matatu ya Sala,tahadhari na kazi,na lazima tuchape kazi ili ugonjwa ukiondoka au ukiendelee tusije kujikuta tupo kwenye anguko la kiuchumi”

Vile vile Ruth Msafiri ameendelea kuhamasisha watoa huduma katika kusanyiko kuvaa barako huku akipiga marufuku kwa taasisi na watoa huduma kuto  kutoa huduma kwa mtu asiyevaa barakoa wakati alipofuata huduma.