Waandishi wa habari wanawake washauriwa kujiamini

Na Jackline kuwanda, DAR ES SALAAM

Waandishi wa Habari wanawake wameshauriwa kuwa na hali ya kujiamini katika majukumu yao ya kazi huku wakisisitizwa kuzingatia Sheria,kanuni,Taratibu, Misingi na Taaaluma ya kazi yao.

Pia wameshauriwa Kufuata Sheria ya Huduma ya Vyombo vya Habari hasa katika kipindi hiki ambacho nchi inaelekea katika uchaguzi unaotarajiwa kufanyika mwezi Oktoba mwaka huu.

Kauli hiyo imetolewa leo Jijini Dar es salaam na  Afisa Mwandamizi wa Idara ya Habari Maelezo Lilian Shirima wakati akifungua semina ya Kitaifa ya Wanawake Wanahabari kwaajili ya kukuza fani yao pamoja na Kubadilishana uzoefu.

Ameendelea kusema kuwa wanawake wanahabari wamekuwa wakikabiliwa na changamoto nyingi katika kazi zao ikiwemo manyanyaso katika vyombo vya habari hivyo amewaaswa wanawake kuendelea kujiamini zaidi hasa kwa kile ambacho wamekuwa wakikifanya katika majukumu yao ya kazi.

Akizungumzia lengo la semina hiyo ,Mkurugenzi Mtendaji wa TAMWA Bi Rose Reuben amesema wamelenga waandishi wa Habari Wanawake Vijana kwaajili ya kuwajengea uwezo wa kuhimili changamoto ambazo ziko katika taaluma ya Habari.

Mwanahabari Mkongwe  Rose Mwalimu ambaye ndiye alikuwa mwezeshaji katika semina hiyo na akizungumzia umuhimu wa vyombo vya Habari katika kuleta usawa wa kijinsia amesema usawa wa jinsia unahusishwa kwa undani  maendeleo endelevu ambayo ni muhimu kwa utambuzi wa haki za binadamu kwa wote.