RC mpya awasili Njombe,aomba ushirikiano

Na Amiri Kiligalila,Njombe

Mkuu wa mkoa wa mpya wa Njombe Eng,Marwa Mwita Rubirya aliyeteuliwa na kuapishwa hivi karibuni na Rais John Pombe Magufuli , amewasili kituo cha kazi na kuzungumza na baadhi ya watumishi wa mkoa na wilaya ya Njombe ambapo amesema atafanya ziara katika wilaya zote nne za mkoa wa Njombe huku akiomba ushirikiano kwa viongozi wa wilaya hizo.

Mara baada ya kuwasili katika ofisi za mkoa ,mkuu huyo mpya amepokea taarifa kutoka kwa  katibu tawala wa mkoa wa Njombe Bi,Catarina Revocat na mkuu wa wilaya ya Njombe Ruth Msafiri muda mfupi baada ya kukaribishwa.

“Wananchi wa Njombe ni wananchi wasikivu,wachapakazi na tunaamini utafanya nao kazi vizuri sana”alisema Catrina Revocat katibu tawala wa mkoa wa Njombe

Eng ,Marwa Mwita Rubirya  ameahidi  kushirikiana na viongozi wa halmashauri mkoa na wilaya katika kutatua changamoto zinazowakabili wananchi vijijini.

“Nitategemea ushirikiano mkubwa kwa wenzangu hapa na ambao wako wilayani,najua taarifa itaandaliwa ili inisaidie kujifunza  Njombe tunafanya nini na ni wapi tuongeze nguvu zaidi ili hatimaye tuwasaidie wananchi”alisema Eng ,Marwa Mwita Rubirya  

Rubirya awali alikuwa meneja wakala wa barabara Tanzania  (TANROD) mkoa wa Mwanza na amechukuwa nafasi ya aliyekuwa mkuu wa mkoa wa Njombe Cristopher  Ole Sendeka  aliyekwenda kwenye majukumu mengine ya kisiasa.