Waumini wapigwa marufu kuingia ibadani wakiwa na mavazi yenye rangi au nembo za vyama vya siasa

 

Na Amiri Kilagalila,Njombe

Waumini wa kanisa la Kiinjili la Kiluthel usharika wa Mjimwema mjini Makambako mkoani Njombe wamepigwa marufuku kuingia ibadani na Nguo,vilemba na kofia zenye nembo au rangi za vyama vya siasa.

Onyo limetolewa na Mchungaji kiongozi wa kanisa hilo Lyosi Mwalyosi,wakati akizungumza na kituo hiki huku akiwa na lengo la waumini kuheshimu sehemu za ibada kwa kuepusha itikadi za vyama.

Vile vile  mchungaji huyo amewataka wanasiasa na waumini wote wanaoabudu katika kanisa hilo kuacha tabia ya kuitana
waheshimiwa kwa kuwa kanisani ni sehemu ya kumwabudu na kumshukuru Mungu pekee.

“Sisi hatuna vyama ila watu wetu ndio wanavyama na hapa tunakuja ibadani unajua kilemba au jezi inaashiria chama Fulani sasa hizo ziwe huko mtaani lakini kwenye ibada tuvae mavazi ya ibada”alisema Lyosi Mwalyosi

“Hata wale wanao fanya mnada wakisema ni kumheshimiwa Fulani hao ni waheshimiwa huko kwenye majukwaa yao na hapa wanakuja kama waumini wa kawaida”alisema tena Lyosi Mwalyosi

Aidha amewataka wagombea wote kunadi sera zao pasipo kutumia lugha za kuchafuana na kuwaomba wananchi kusikiliza sera za wagombea ili wawapime na wajue ni yupi watakayemchagua.

Baadhi ya wanasiasa ambao wanaabudu katika kanisa hilo akiwemo Navy Sanga Mgombea wa udiwani kata ya kitisi kupitia CCM
na Seth Vegulla mgombea udiwani kupitia chama cha Demokrasia na Maendeleo CHADEMA wamemshukuru mchungaji kwa
kuzuia hayo na kueleza kuwa endapo yangeachwa yangepeleka mgawanyiko ndani ya kanisa hilo.

“Pale kanisani hatuendi kwa ajili ya uheshmiwa wala hatuendi kwa ajili ya siasa tunaenda kumshukuru Mungu lazima tuheshimu mahala pa Ibada” alisema Navy Sanga

Seth Vegulla alisema “Mchungaji amefanya vizuri sana kwasababu siasa ina nguvu na inaweza kuligawa kanisa”