Wilaya ya Wanging’ombe bado inakabiliwa na changamoto katika usimamizi wa miradi ya maji

Na Amiri Kilagalila,Njombe

Pamoja na juhudi za wakala wa maji safi na usafi wa mazingira vijijini (RUWASA)  na serikali ya wilaya ya Wanging’ombe mkoani Njombe  katika kuhakikisha huduma ya maji safi na salama yenye kutosheleza inawafikia wananchi wote.

Bado kuna changamoto katika usimamizi na uboreshaji wa miradi iliyopo na inayoendelezwa ili kuongeza huduma endelevu kwa jamii ya wilaya hiyo.

Amebainisha hilo kaimu meneja RUWASA wilaya ya Wanging’ombe Inj.Charles Mengo katika mkutano mkuu wa wilaya kwa jumuiya za maji uliofanyika  wilayani humo huku akieleza njia mbali mbali zitakazoweza kukabiliana na changamoto hiyo kwa jamii ikiwemo mikutano ya pamoja ya mara kwa mara ya jumuiya za watumia maji.

“Ili kubolesha na kuongeza ufanisi katika utoaji wa huduma hiyo,ni lazima  kuendelea kuwepo na mkutano mkuu wa wilaya mara mbili kwa mwaka kwa ajili ya kujadili chanagamoto hizo katika utoaji wa huduma utakao wakutanisha wataalamu wa maji,kamati za maji pamoja na watumishi wa jumuiya za maji ili kujadili,kutathmini na kubadilishana uzoefu katika maswala mbali mbali yanayohusu maji na usafi wa mazingira”alisema Inj.Charles Mengo

Aidha amesema hali ya huduma ya maji katika wilaya hiyo ina jumla ya miradi ya maji 36 inayotumia tekinolojia mbali mbali huku visima vifupi 443,virefu 12 ikiwa ni pamoja na mabwawa madogo madogo.

Vile vile amesema huduma ya maji safi na salama inawafikia wakazi wapatao laki moja hamsini elfu na mia sita themanini na sita  (150,686) kati ya wakazi hao wakazi wapatao stini na tatu elfu na tisini na tatu sawa na 71%  ni wa maeneo ya vijijini na wakazi wapatao 85,393 sawa na asilimia 88.42 ni kwa maeneo ya mjini.

Veronicka Gelad ni kaimu katibu tawala wilaya ya Wanging’ombe,ametoa wito kwa jumuiya za maji kuweka mikakati madhubuti itakayosaidia kuhakikisha miundombinu ya maji inatunzwa.

“Katika kukabiliana na changamoto zinazoathiri uendeshaji wa miradi ya  maji vijini ambayo serikali inatumia fedha nyingi,ni lazima tujitoe kwa kuchangia ghalama za kuchangia miradi yetu ya maji hivyo kila mmoja ni lazima awe barozi,ninaamini wanajumuiya kuweka mikakati madhubuti ambayo itasaidia wanajumuiya na jamii kuhakikisha miundombinu ya maji inatunzwa na maji yanapatikana kwa wakati”alisema Veronicka

Nao baadhi ya washiriki wa mkutano huo wa jumuiya za watumia maji,wamesema ipo haja ya kuendelea kushirikiana na jamii kikamilifu ili kusaidia utunzaji wa vyanzo vya maji huku wakiomba wakala wa barabara mijini na vijijini TARURA wilayani humo kuwa na ushirikiano na jumuiya za watumia maji ili kukabiliana kwa pamoja na uharibu wa miundombinu ya maji zinapotengenezwa barabara.

Simon Msemwa,Tumain Sanga na Roda Ngimbudzi ni wakazi wa kijiji cha Itulahumba  wanaonufaika na uwepo mradi wa maji uliopo kijiji jilani cha Isindagosi ambao ni miongoni mwa miradi mikubwa ya maji wilayani humo.wamesema licha ya uwepo wa changamoto kwa baadhi ya miradi wanaomba jamii kuendelea kutunza vyanzo vya maji huku wakishukuru kupata  maji karibu na makazi yao.