Serikali yasaini mikataba ujenzi wa barabara ya njia nne kwa kiwango cha lami Dodoma

 Na Jackline Kuwanda, DODOMA

Waziri wa Ujenzi,Uchukuzi na  Mawasiliano Mhandisi Issack Kamwelwe ameshuhudia utiaji saini mikataba miwili ya ujenzi kwa kiwango cha lami,Barabara ya Mzunguko ya jiji la Dodoma ya njia nne ambayo ina kilomita 112.3 unaofadhiliwa na Benki ya Afrika.

Mradi huo unatekelezwa na serikali kwa gharama ya Bilioni mia nne na tisini na nne (494) ambapo shilingi Bililoni mia nne kumi na mbili (412) ni mkopo wa masharti nafuu kutoka Benki ya Maendeleo ya Afrika  na  shilingi Bilioni themanini na mbili (82) ni mchango wa serikali ya Tanzania.

Akizungumza mara baada ya kushuhudia utiliaji saini wa wa mradi huo, Mhandisi Kamwelwe amesema Mradi pia utahusisha miradi mingine midogo midogo katika maeneo ya jiji la Dodoma huku akisema ni matarajio yake kuwa mradi huo utakamilika kwa muda uliopangwa.

Wakati huo amesema ujenzi wa mradi huo utakapo anza itakuwa ni fursa ya ajira kwa watanzania na wachangamkie fursa hiyo hasa wakazi wa Dodoma huku akiwataka wale ambao watapata fursa ya kufanya kazi katika mradi huo kuwa walinzi wa mali zote za mradi  na kujiepusha na wizi wa vifaa.

Akitoa Taarifa fupi ya ujenzi wa Barabara ya njia nne kuzunguka jiji la Dodoma, Mtendaji Mkuu wa TANROADS Mhandisi Patrick Mfugale amesema Barabara hiyo ina urefu wa kilomita 112.3 na imegawanywa katika maeneo mawili ili kusudi ujenzi huo uweze kukamilika kwa muda.

Kwa Upande wake Mkuu wa Mkoa wa Dodoma Dkt Bilith Mahenge amesema mradi huo ni kati ya mradi utakao changia kuifanya Dodoma kuwa ya kisasa iliyojengwa kwa kutumia Sayansi ya Tekinolojia ikiwa na maana ya kwamba jiji la Dodoma litawezeshwa kuwa jiji linalo vutia.

Mradio huo kama ilivyo miradi mingine utajumuisha miradi midogo midogo inayogusa jamii kwa pamoja katika sekta za Afya, Maji,Elimu hata Barabara na usalama Barabarani.