Ole Sendeka ataka wapinzani kupiga picha za mwisho na Zuria la Bunge

Na Amiri Kilagalila,Njombe

Ikiwa zimebaki siku 9 ili kuvunjwa Bunge la jamhuri ya muungano wa Tanzania,tayari kuelekea katika shughuli za uchaguzi wa awamu ya 6 hapo Octoba  2020.

Mkuu wa mkoa wa Njombe Cristopher Ole Sendeka amewataka wabunge wa vyama vya upinzani kutumia siku chache zilizobaki kupiga picha na zuria la Bunge pamoja na bendera ya Bunge kwa ajili ya kumbu kumbu kwa kuwa itakuwa ni vigumu kwao kuingia Bungeni kwa sasa.

Ole Sendeka aliyasema hayo jana wakati akizungumza na madiwani wa halmashauri ya mji wa Makambako katika kikao chao cha baraza maalum la kujadili hoja za mkaguzi,mda mchache kabla ya kikao cha kuvunja baraza hilo.

“Bunge linavunjwa tarehe 19,waambieni wabunge wa upinzani walioko kwenye mjengo wa Bunge watumie siku hizi kumi kupiga picha kwenye zuria jekundu la Bunge,watumie siku hizi kumi kupiga picha na bendera ya Bunge kwasababu Mh,Lowasa alikwishatabili kwamba upinzani ukishindwa 2015 usubili miaka 50”alisema Christopher Ole Sendeka

“Nyanda za juu kusini hakuna jimbo litakalo kwenda upinzani,na kwa chama kile ambacho kimekuwa kinajinasibu ambacho leo kinafanya maigizo hata leo (jana) yale ya Dodoma mliyoyasikia nataka niwaambieni kwa upande wa Tanzania Bara wataliskia tu Bunge” alisema tena Christopher Ole Sendeka

Sendeka amesema anaamini watanzania wamepata majawabu dhidi ya vilio vilivyotokana na ufisadi,Rushwa,uonevu,ubadhilifu,mapambano ya watumishi hewa,mishahara hewa,wanafunzi hewa kutokana shughuli kubwa iliyofanywa na Rais Magufuli ili kurejesha imani kwa watanzani dhidi ya Chama cha Mapinduzi pamoja na kujenga miundombinu mikubwa ikiwemo Reli ya kisasa.

Katika swala la hoja za mkaguzi katika halmashauri ya Makambako,Ole Sendeka ametoa pongezi kwa halmashauri hiyo kuendelea kupata hati safi kwa miaka 7 mfululizo pamoja na kupunguza hoja za mkaguzi kutoka 50 mpaka 28,huku akiitaka halmashauri kuendelea kuwa mabingwa wa kuzuia hoja na sio kutengeneza hoja za mkaguzi.

Kwa upande wake mbunge wa jimbo la Makambako Deo Sanga ametumia nafasi hiyo kumtaka mkurugenzi kusimamia vizuri kazi zilizokuwa zikifanywa na madiwani mpaka mwezi wa 11 litakapoundwa baraza jipya.

“Baraza hili ni la mwisho kazi zote zilizofanywa na madiwani hawa zinaachwa kwa mkurugenzi ambao madiwani kwa muda mfupi watakuwa ni hawa wakuu wa idara ni imani yetu mpaka tutakapo ludi mwezi wa 11 baada ya uchaguzi tuone shughuli zimesimamiwa vizuri”alisema Sanga mbele ya Mkurugenzi wa halmashauli Poul Malala

Mwenyekiti wa halmashauri ya mji wa Makambako Hanana Mfikwa amesema kama madiwani wamefanya kazi kubwa katika halmashauri hiyo hivyo kilichobaki sasa ni kwenda kujipanga upya katika swala la uchaguzi.

Baadhi ya madiwani akiwemo Emmanuel Fute ambaye ni diwani wa kata ya Kitandililo na Jackson Kivambe diwani wa kata ya Kivavi wawamesema wanakwenda kumaliza muda wao lakini wanaiomba serikali ya mkoa kuzirejeshe fedha za wananchi zilizokusanywa na serikali kutoka mikononi mwa wachache waliohujumu vyama vya ushirika na Saccos ikiwemo benk ya wananchi Njocoba ili zikatumike kwa maendeleo ya wananchi,Huku mkuu wa mkoa wa Njombe akiahidi kurejesha fedha hizo zaidi ya bilioni 5 kabla ya kumalizika kwa mwezi July.